Kêst 74: Lidmaatskip fan 'e Ried fan Steat
- De Koning is foarsitter fan ’e Ried fan Steat. De fermoedlike opfolger fan ’e Kening hat nei it berikken fan ’e âldens fan achttjin jier fan rjochtswegen in sit yn ’e Ried. By of út krêft fan ’e wet kin oan oare leden fan it Keninklik Hûs in sit yn ’e Ried ferliend wurde.
- De leden fan ’e Ried wurde by keninklik beslút foar it libben beneamd.
- Op eigen fersyk en fanwegen it berikken fan in by de wet fêst te stellen âldens wurde hja ûntslein.
- Yn ’e by de wet oanwiisde gefallen kinne hja troch de Ried tydlik út it amt setten of ûntslein wurde.
- De wet regelet fierder harren rjochtsposysje.
Ferklearring
Tink derom: allinnich de Nederlânsktalige ferzje fan de Grûnwet jildt.
De Kening is de foarsitter fan 'e Ried fan Steat. De kroanprins(sen) meie de gearkomsten fan 'e Ried bywenje as se achttjin jier âld binne. De wet kin dit ek foar oare leden fan it Keninklik Hûs regelje. Bygelyks, de Prins-gemalinnen hienen sitten yn 'e Ried fan Steat, en Máxima naam ek in sit yn 'e Ried fan Steat yn nei har houlik mei Willem-Alexander.
De leden fan 'e Ried wurde foar it libben beneamd by Keninklik Beslút, d.w.s. troch de regearing. Se meie allinnich ûntslein wurde:
- op eigen fersyk;
- as se in by wet bepaalde leeftyd berikt hawwe (dat is 70 jier neffens Artikel 3 fan 'e Wet op 'e Ried fan Steat);
- troch de Ried fan Steat sels yn bepaalde gefallen dy't yn 'e wet oanjûn binne (Artikel 3a fan 'e Wet op 'e Ried fan Steat).
De Ried fan Steat kin in lid ek skorse yn gefallen dy't yn 'e wet oanjûn binne.
Dit soarget derfoar dat harren juridyske posysje sterk oerienkomt mei dy fan leden fan 'e rjochterlike macht en dat de ûnôfhinklikens fan 'e leden fan 'e Ried garandearre is. De Ried fan Steat ferfollet ommers ek in wichtige funksje op it mêd fan bestjoerlike jurisdiksje.