Artíkulo 78a: Ombudsman Nashonal
- Ombudsman nashonal ta investigá, riba petishon òf riba inisiativa propio, kondukta di e órganonan atministrativo di Estado i di e otro órganonan atministrativo designá den òf a base di lei.
- Kámara di Representante di Staten General ta nombra Ombudsman nashonal i un Ombudsman suplente pa un periodo ku lo fiha den lei. Ta duna nan retiro riba petishon propio i ora nan kumpli un edat ku lo fiha den lei. Kámara di Representante di Staten General por suspendé nan òf duna nan retiro den e kasonan indiká den lei. Por lo demas, lei ta regla nan posishon hurídiko.
- Lei ta regla e kompetensianan i funshonamentu di Ombudsman nashonal.
- Den òf a base di lei, por enkargá Ombudsman nashonal ku otro tarea tambe.
Eksplikashon
Tene na kuenta: solamente e vershon na hulandes di Konstitushon tin balides.
Na 1999 e Nationale ombudsman a keda inkluí den Konstitushon. Te ku e tempu ei, e Nationale ombudsman, ku a kuminsá su trabounan dia 1 di yanüari 1982, no tabata keda menshoná eksplícitamente den Konstitushon.
E Nationale Ombudsman ta hasi investigashon, riba petishon òf di su mes inisiativa, riba aktuashon di e gobièrnu sentral i di otro órganonan di gobernashon indiká pa òf pa medio di lei. Lei por duna tambe otro tareanan na e Ombudsman.
E Nationale ombudsman i un substituut-ombudsman ta keda nombrá pa Tweede Kamer. Sólamente Tweede Kamer por retirá nan, den e siguiente kasonan:
- riba nan mes petishon
- ora di alkansá e edat menshoná den lei (70 aña, artíkulo 3 Wet Nationale ombudsman)
- den kasonan di kualidat fura di ley (artíkulo 3 Wet Nationale ombudsman)
Tweede Kamer por skors e Nationale ombudsman i un substituut-ombudsman tambe pa e motibunan menshoná den artíkulo 4 di e Wet Nationale ombudsman.
Den e lei akí tambe e disposishonnan tokante posishon hurídiko di e Nationale ombudsman i un substituut-ombudsman ta inkluí, i ta regla e kompetensia i e modo di traha.