Artíkulo 12: Derecho di kas
- Ta solamente esnan asigná den òf a base di lei tin pèrmit di drenta un kas sin outorisashon di e habitante, i solamente den e kasonan determiná den òf a base di lei.
- Pa drenta un kas konforme insiso unu di e artíkulo akí, un persona mester legitimá su mes promé i partisipá pa ki propósito e entrada ta nesesario, a ménos ku ta trata di un eksepshon fihá den lei.
- Ta duna e habitante un informe por eskrito di e entrada mas pronto posibel. Si e entrada a sosodé na interes di siguridat nashonal òf di un proseso penal, por posponé dunamentu di e informe, konforme e reglanan ku lo fiha den lei. Den e kasonan ku lo determiná den lei, por keda sin duna e informe si interes di siguridat nashonal ta oponé esei riba un base permanente.
Eksplikashon
Tene na kuenta: solamente e vershon na hulandes di Konstitushon tin balides.
Artíkulo 12 ta regla ku niun hende no mag di drenta un kas sin pèrmit di e habitante. Ta solamente lei por menshoná kasonan den kual esaki sí mag. Si un espasio ta un kas no ta dipendé solamente di e konstrukshon i si tin mebel pará. Loke ta uza e espasio p'e tambe ta hunga un ròl.
Si un hende mag di drenta un kas tòg, e persona ei mester identifiká su mes i konta pakiko e ta drenta e kas. Pero aki tambe tin eksepshon, por ehemplo den situashon di emergensia manera ora tin kandela.
Ademas ta manda un relato por skrito mas libé posibel pa e habitante. Posposishon di esaki ta posibel si esaki ta nesesario den interès di seguridat nashonal òf di persekushon penal. Kanselashon ta posibel mes si seguridat nashonal ta eksigí esaki. P'esei ta posibel ku un habitante hamas ta haña sa ku un hende a wak rònt na un manera sekreto den su kas.
Den e Algemene wet op het binnentreden a igualá e diferente reglanan legal di drentamentu i a reforsá e garantianan pa e habitante.