Artíkulo 84: Modifikashon di konsepto di lei; enmienda
- Miéntras Kámara di Representante, respektivamente e seshon konhunto, no aprobá un proposishon di lei entregá pa òf na nòmber di Rei, e kámara òf e seshon por modifik’é riba proposishon di un òf mas miembro i gobièrnu tambe por modifik’é.
- Miéntras Kámara di Representante, respektivamente e seshon konhunto, no aprobá un proposishon di lei ku e mes a entregá, e kámara òf e seshon por modifiká esaki riba proposishon di un òf mas miembro, i e miembro òf miembronan ku a somet’é tambe por modifik’é.
Eksplikashon
Tene na kuenta: solamente e vershon na hulandes di Konstitushon tin balides.
Tanten ku un propuesta di lei ta en tratamentu serka Segundo Kámara, gobièrnu por kambia un propuesta di lei entregá p'e. Segundo Kámara tambe por kambia un propuesta di lei entregá pa gobièrnu. E di dos akí ta wòrdu yamá e derecho di amienda.
Un propuesta di inisiativa por wòrdu kambiá pa e inisiadónan. Segundo Kámara den su totalidat tambe tin e derecho di amienda pa propuestanan di inisiativa, i p'esei por kambia e propuestanan akí, asta si e inisiadónan ta 'kontra' esei. Gobièrnu no por kambia propuesta di inisiativa.
Prome Kámara no tin e derecho di amienda. Esei ta resulta di artíkulo 85, den kual ta pará ku Prome Kámara ta 'konsiderá e propuesta manera el a wòrdu mandá p'e'. Esei ta nifiká ku Prome Kámara mester trata e propuesta manera el a wòrdu aprobá pa Segundo Kámara.