Artíkulo 103: Estadonan di eksepshon; leynan di emergencia; derechi penal di guera
- Lei ta determiná den ki kaso por deklará, mediante dekreto real, un estado di eksepshon designá komo tal den lei, ku e meta di mantené siguridat eksterno òf interno; tal lei ta regla e efektonan di tal deklarashon.
- Den tal sentido, por desviá for di e disposishonnan konstitushonal tokante kompetensia di e gobièrnunan di provinsia, e munisipionan, e entidatnan públiko den sentido di artíkulo 132a i e outoridatnan di maneho di awa, i for di e derechonan fundamental reglá den artíkulo 6, te asina leu ku esaki ta konserní ehersisio di e derecho deskribí den tal artíkulo pafó di edifisio i lugá privá, den artíkulo 7, 8, 9, 12, insiso dos i tres, i artíkulo 13, i tambe for di artíkulo 113, insiso unu i tres.
- Inmediatamente despues ku deklará un estado di eksepshon i tanten ku no kansel’é mediante dekreto real, Staten General ta disidí, kada bes ku nan konsiderá esei nesesario, si e estado di eksepshon mester keda na vigor; nan ta deliberá i tuma desishon al respekto den seshon konhunto.
Eksplikashon
Tene na kuenta: solamente e vershon na hulandes di Konstitushon tin balides.
Den sierto sirkunstansia spesial por desviá di e disposishonnan konstitushonal ku ta regla e kompetensianan di direktiva di provinsia, munisipio i waterschap i di e algun derechonan fundamental spesífikamente menshoná:
- libertat di religion (artíkulo 6)
- libertat di ekspreshon (artíkulo 7)
- libertat di asosiahon (artíkulo 8)
- libertat di reunishon i manifestashon (artíkulo 9)
- inviolabilidat di kas (artíkulo 12)
- sekreto di karta (artíkulo 13).
Ademas por desviá di e disposishon den artíkulo 113 ku ta solamente xues por impone un kastigu di privashon di libertat.
E lei mester stipulá den kual kasonan ta trata di un situashon di eksepshon asina. Nunka no por desviá di e kompetensianan konstitushonal di gobièrnu i Staten-Generaal.
Despues di proklamashon di un estado di eksepshon pa gobièrnu, Staten-Generaal ta desidí den reunishon konhunto si e estado di eksepshon ta kontinua. Despues tambe nan por tuma un desishon semper tokante kontinushon di un estado di eksepshon. E estado di eksepshon por keda kenselá tambe ku un Dekreto Real.
Den e Coördinatiewet uitzonderingstoestanden tin preskripshon di prosedura inkluí pa proklamashon i terminashon di dos estado di eksepshon: e estado di emergensia limitá i e estado di emergensia general. E Oorlogswet voor Nederland ta regla proklamashon di un estado di emergensia den kaso di guera. E kompetensianan pa outoridat sivil den un estado di emergensia tambe ta reglá pa lei.