Artíkulo 125: Órganonan provinsial i munisipal

Artíkulo 125
  1. Na kabes di provinsia i munisipio tin konseho provinsial, respektivamente konseho munisipal. Nan reunionnan ta públiko, eksepto den e kasonan ku lo regla den lei.
  2. Kolegio ehekutivo provinsial i e komisario di Rei tambe ta forma parti di gobièrnu di provinsia; kolegio ehekutivo munisipal i alkalde tambe ta forma parti di gobièrnu di munisipio.

Eksplikashon

Tene na kuenta: solamente e vershon na hulandes di Konstitushon tin balides. 

Provinciale Staten ta na kabes di e provinsia, e konseho munisipal ta na kabes di e munisipio. Nan reunionnan ta públiko. Ku esaki ta enfatisá nan posishon komo e organonan prinsipal di gobernashon di provinsia i munisipio, skohe demokratikamente.

Aparte di e Provinciale Staten, e gobernashon di e provinsia ta konsistí di e Gedeputeerde Staten i e Komisario di Rei(na). E gobernashon di un munisipio ta konsistí aparte di e konseho munisipal tambe di e kolegio di burgemeester en wethouders i e burgemeester.