Artíkulo 46: Sekretarionan di Estado

Artíkulo 46
  1. Por nombra i retirá sekretario di estado mediante dekreto real.
  2. Un sekretario di estado ta aktua komo minister na lugá di e minister den e kasonan ku e minister konsiderá ku ta nesesario i konforme su instrukshonnan. E sekretario di estado ta responsabel den tal kalidat, sin perhuisio di responsabilidat di e minister.

Eksplikashon

Tene na kuenta: solamente e vershon na hulandes di Konstitushon tin balides. 

Sekretarionan di Estado ta wòrdu buská i despues nombrá mesun manera ku ministernan durante un formashon di kabinete. Sekretarionan di Estado tin un propio responsabilidat polítiko pa e tereno di maneho ku formalmente a wòrdu asigná na nan pa nan minister, pero ku den práktika ta wòrdu determiná kaba di manera general durante e formashon di kabinete.

E sekretario di Estado ta rindi kuenta di manera independiente den parlamento. Si parlamento pèrdè konfiansa den un sekretario di Estado, esaki lo mester tuma su retiro. E minister por keda sinta e ora ei, aunke e minister ta ko-responsabel.

Di otro banda, un sekretario di Estado sí ta entrega su retiro si e minister tuma retiro pa kualke motibu. Esaki ta sigui for di e prinsipio ku un minister mes mester por desidí si e ke i ken e ke komo sekretario di Estado.