Artíkulo 132a: Entidatnan públiko karibense

Artíkulo 132a
  1. Den lei, por instituí i disolvé, den e parti karibense di Hulanda, entidat públiko teritorial ku no ta provinsia ni munisipio.
  2. Artíkulo 124, 125 i 127 te ku 132 ta aplikabel analógikamente na tal entidatnan públiko.
  3. Den tal entidatnan públiko, ta tene elekshon pa un kolegio elektoral pa Senado. Artíkulo 129 ta aplikabel analógikamente.
  4. Pa e entidatnan públiko akí, por fiha regla i tuma otro medida spesífiko en bista di sirkunstansia partikular ku ta hasi e entidatnan públiko akí esensialmente diferente for di e parti europeo di Hulanda.

Eksplikashon

Tene na kuenta: solamente e vershon na hulandes di Konstitushon tin balides. 

E artíkulo akí ta regla e base konstitushonal di e islanan Boneiru, Sint Eustatius i Saba den Hulanda Karibense. E artíkulo ta duna ku pa medio di lei por establesé i abolí entidatnan públiko den Hulanda Karibense. Ademas, ku e kambio akí ta duna ku den e entidatnan públiko ta tene elekshon pa un kolesho elektoral.

Por último, ta duna ku debí na e posishon spesial di Hulanda Karibense - leu di Hulanda Oropeo i e posishon komo un 'isla' - regla i medidanan spesial por konta.